政情：梁麗幗有望做大狀 周永康獄中寄語堅持
學聯前常委梁麗幗在二○一四年違法佔領行動期間，曾經代表學聯同港府官員對話，最近佢多位昔日戰友相繼被判罪成同入獄，而佢就考入法學專業證書課程（PCLL），有望成為律師或大律師。梁麗幗嘅戰友、學聯前秘書長周永康喺獄中寫信，以「高度專業」諷刺本港司法界，叫梁麗幗要「堅守住作為梁麗幗這樣的一個人」。
呢封信係周永康喺九月於壁屋監獄撰寫，信中透露梁麗幗已經獲得PCLL取錄，笑言「早晚會出現梁麗幗資深大律師 」。不過，周永康提醒梁麗幗，指佢身上有種「越燒越旺的風向」，語帶雙關叫佢留意避免自己「筋疲力盡」（Burn out）。
明白心情糾結矛盾
與梁麗幗喺佔領期間同政府對話嘅，仲包括周永康、前副秘書長岑敖暉、前常委羅冠聰同埋前常務秘書鍾耀華。而周永康同羅冠聰早前因衝擊政總案而被改判入獄，岑敖暉尋日亦喺佔旺案中被裁定藐視法庭罪成，好大機會被判監禁，一眾戰友處境同梁麗幗相比，猶如天堂與地獄，難怪周永康在信中亦話，知道梁心內有無數糾結同心情矛盾複雜喇。