中環出更：陳國超娶新抱 道教婚禮似粵語長片
香港人結婚嘅儀式無非係喺教堂行禮，或者喺屋企同父母斟茶、拜下祖先。圓玄學院主席陳國超（超哥）早前娶新抱，一對新人就喺圓玄學院舉行全港最大型嘅道教婚禮，首次飲新抱茶嘅超哥仲話，自己都係第一次參加道教婚禮，形容場面好似睇粵語長片咁喎！
點解會諗到行道教婚禮？超哥話係新郎哥、即身兼仁愛堂副主席嘅大仔陳承邦嘅主意，加上圓玄學院信奉儒釋道三教，所以就請香港道教聯合會主席梁德華主禮。超哥話，原本只係預幾十人參與，結果有二百幾人到場，場面好墟冚。
梁德華：表達「敬天法祖」觀念
本身係道士嘅梁德華話，今次都係佢第一次喺香港為道教婚禮主禮，雖然道教婚禮未至於失傳，間中喺道教寺廟例如黃大仙祠都有舉行，不過今次就係佢見過最隆重嘅一場。至於道教婚禮同其他婚禮嘅主要不同之處就係要表達中國人「敬天法祖」嘅倫理觀，即係透過經讚感謝神明恩賜，同埋父母高堂養育之恩。
有份幫手籌備婚禮嘅圓玄學院副主席湯修齊就話，當日祈請學院供奉嘅一眾神明，包括佛祖、孔子、呂祖、觀音及玉皇大帝等向一對新人祝福，同一般喺屋企或家祠行禮好唔同。湯修齊太太Yvonne都有去觀禮，佢形容學院大紅燈籠高掛，喜氣洋洋好熱鬧喎。
而新人夜晚嘅婚宴就移師紅磡一間五星級酒店舉行，現場布置都採用象徵吉祥嘅大紅色，十分古色古香，城中政商界、慈善界名人及親友近千人齊齊去飲。超哥大讚新抱林卓穎一定係好好嘅家嫂，事關佢喺婚禮中跪拜幾十次都仲好好笑容，仲話親家都係退休人士，好得閒，隨時可以湊孫喎，即係曲線催促一對新人快啲幫佢添孫喇！
卓妮