施政報告提出，特首將會親自領導創新及科技督導委員會，外界有意見認為創新及科技局局長楊偉雄將會被架空，楊偉雄尋日就政策回應記者嘅提問時，否認被架空，但就噏錯部分資料，要創科局常任秘書長卓永興糾正，即係唔熟書喇！
楊偉雄話創新及科技督導委員會一向都存在嘅，以往由財政司司長領導，改由特首領導該督導委員會，層次更高，喺商討大灣區事情上有好處，對口單位將會係廣東省省長，「我係唔夠班（口架）」，又舉例指新加坡總理亦統領有關創科發展嘅督導委員會。
點知卓永興之後就話係溝通上唔清楚，財政司司長領導嘅委員會係創新科技及再工業化委員會，該委員會現時仍然喺度，係諮詢性質，大部分嘅委員都係非政府人士，當中包括業界，而新成立嘅創新及科技督導委員會所有成員都係來自政府，可以對政策「拍板」。
另外，楊偉雄又被問到點解喺記者會用紙筆，冇帶頭善用科技，佢就話自己有平板電腦，仲好喜歡用平板電腦添，但記者會現場嘅光線較難睇得清楚平板電腦，又擔心喺記者會期間用手打字會被認為唔尊重，加上記錄較簡單所以先用紙筆寫字。