政情：姚羅棄東華 葉劉不攻「頂」中西區混戰變隻揪

東華選區暫有民主黨伍凱欣同小學校長呂錦強報名，姚松炎同羅雅寧尋日一齊發聲明話唔參選，理由係避免出現「非建制之間的對陣」，變相益咗被指獲建制派支持嘅呂錦強。

以免分薄票源 益咗對家

至於山頂區補選，暫有教育局前政治助理、自由黨楊哲安報名，來自民主派嘅「2047香港監察」召集人錢志健則正在收集選民提名。之前講過有意參選山頂區嘅葉劉淑儀，尋日亦召開記者會公布棄選。據悉，葉劉棄選嘅原因係以免分薄建制派票源令錢志健漁人得利。

換言之，中西兩區補選極可能只有建制派及民主派各一人參選，由混戰變回「隻揪」。

被問及點解放棄攻「頂」？葉劉淑儀話雖然好想參與補選，但經諮詢黨內領導後，認為目前並非適合時機，因立法會復會後工作較為繁忙，以及補選時間比預期早，因此認為不夠時間作準備。不過，佢話唔排除會參與二○一九年區議會選舉，至於選區方面則未有決定。

其實，同為行會、立法會飲食界議員兼自由黨主席張宇人，早前陪同楊哲安報名參選時，曾暗寸葉劉咁得閒做區議員。而葉劉亦透露，女兒同自由黨都有勸退佢，更講笑咁話：「成日叫我唔好選就係廚房佬（意指張宇人），你知啦有把刀嗰個，日日見到我喺八樓（二人喺立法會辦公室的樓層）都哦住我」。佢又話張宇人希望佢幫忙為該黨參選人楊哲安拍照，佢就話會考慮為自由黨助選，至於投票意向則保密。