中環出更：「性騷擾」陳淑莊 黃國健唔驚老婆殺？
立法會十八個事務委員會尋日選舉正、副主席，喺發展事務委員會開會前，穿上搶眼紅色上衣嘅議員陳淑莊（Tanya）一邊撥扇一邊步入會議室，在座嘅另一位議員黃國健（KK）不禁讚Tanya「好型」。Tanya邊坐低邊話啱啱急步趕番嚟，所以「好熱」，此時KK就形容Tanya衣着似「舊上海」，結果畀主持會議嘅飲食界議員張宇人笑，叫KK唔好「性騷擾」議員，在場議員隨即起哄，更有人稱「你老婆殺咗你呀！」
早前議員何君堯發表「殺無赦」論，內務委員會討論譴責何君堯動議。當時KK擺埋老婆上枱為何君堯護航，指佢老婆經常話要殺咗佢，但佢並唔認為老婆真係要殺佢。KK今次咁口花，搞到被指「性騷擾」女同事Tanya，唔知佢老婆會唔會再「追殺」佢呢？
吳永嘉被爆成日約容海恩去玩
朝早爆完「性騷擾」事件，其後工業界議員吳永嘉（Jimmy）又被爆經常約新民黨嘅容海恩食飯唱K，唔通Jimmy唔驚老婆鬧？
話說喺政制事務委員會會議前，建制派議員陳克勤、Jimmy、陳振英同新民黨主席葉劉淑儀等喺度細聲講大聲笑。搞邊科？事後問番葉劉，佢話陳克勤等人當時正取笑Jimmy係容海恩嘅男友，成日約容海恩唱K食飯，尋日連坐位都坐喺容海恩隔籬。
葉劉聽完，即刻講笑咁警告Jimmy，唔好經常約容海恩去街，因為容海恩要多啲落區喎。竟然出「禁制令」，搞到班議員笑到停唔到口，陳克勤仲拍爛手掌添！
卓妮