政情：今日你上鏡：馮興禮去立會捉勞福議員打招呼

馮興禮話自己負責同議員聯繫嘅工作，而啱啱返咗工幾日就撞正政府發表施政報告，知道呢幾日啲議員都好忙碌，呢段時間未必得閒同佢傾偈，所以尋日特登去立法會，捉住啲關注勞福問題嘅議員打聲招呼先。

咁呢份新工係咪好有難度？佢就話勞福嘅範疇涉及好多數字、好複雜，一時間都未消化晒，但就話局長羅致光可能因為教過書，所以好多時局長講出嚟畀佢知仲易明啲，好過佢自己睇資料喎。