政情：建制三議員 名字被建「國」
擔任建制派班長嘅立法會商界議員廖長江，日前提交一份由三十七名建制派議員聯署，關於修改現行嘅立法會《財務委員會會議程序》。聯署提交後，一直備受爭議，但尋日下晝廖長江突然再度提交一份替換頁文件，喺對比下，發現原來早前所提交嘅文件當中，有三名議員嘅中文名字後，加上一個「國」字，咁都會甩轆。
下晝補交番正確替換頁
立法會財務委員會秘書尋日下晝發出文件，指廖長江補交聯署文件嘅替換頁，細看之下，原來係一份只有三十七名建制派議員中英文名字嘅文件，係早前聯署文件中附件A嘅替換頁。翻查立法會嘅文件，廖長江喺本周一所遞交嘅十七頁聯署文件當中，附件A嘅聯署名單上，議員柯創盛、葛珮帆同易志明嘅中文名字，卻分別變成「柯創盛國」、「葛珮帆國」同「易志明國」，但英文名字則未有變動，而尋日廖長江所遞交嘅文件中，三十七名議員嘅中、英文名字則無誤。
過去建制派曾多次表明反對港獨，但今次卻出現甩轆，突然被建「國」，未知三位被建「國」嘅議員會有乜嘢感受？