政情：連任工務小組主席 盧偉國被嘲廠長
立法會財務委員會轄下兩個小組委員會尋日選舉正、副主席，工程界盧偉國與朱凱廸競逐主席一職，而兩人喺選舉前舉行嘅議員質詢環節中針鋒相對，最終盧偉國以三十二票對十六票擊敗朱凱廸成功連任主席，而資訊科技界莫乃光則喺冇對手下當選副主席。
發問當拉布 邏輯受挑戰
盧偉國喺質詢環節中批評泛民拉布，指過去一個年度，用七十三小時只處理二十幾個工程項目，比正常情況花更多時間，作為主席要控制議員重複同冗長發言嘅情況，但朱凱廸則批評盧偉國經常以工廠廠長嘅邏輯，以工作時間作為係咪合規格嘅標準，但作為議員要謹慎同認真監察政府，唔好將發問抹黑為拉布。
相對於工務小組委員會，人事編制小組委員會正、副主席選舉則好平和，新民黨葉劉淑儀同公民黨楊岳橋都喺冇對手下成為正、副主席，但葉劉就喺主持會議時爆出笑料。
話說喺副主席選舉時，公民黨譚文豪提名楊岳橋，黨友郭榮鏗和議，但葉劉未能即時叫出郭榮鏗嘅中文全名，佢隨後自行解畫並向郭道歉，話可能因太耐冇主持會議，一時生疏咗，並指「Dennis（郭的洋名）我記得嘅」。