政情：聽施政報告 冇咗DQ四子泛民唔再搞事？
眾所周知，過往前特首梁振英發表施政報告或出席特首答問大會時，一班民主派立法會議員唔係準備定大型示威道具「侍候」，就係掟嘢，甚至玩集體離場抗議。不過，新一屆政府尋日喺立法會發表首份施政報告，冇咗被取消立法會議員資格嘅示威常客社民連梁國雄（長毛）、香港眾志羅冠聰、劉小麗同姚松炎（DQ四子），一眾泛民議員就乖乖坐足全場，冇人掟嘢，亦冇任何聯合行動，莫非從此泛民搞事已完？
特首林鄭月娥尋日喺立法會發表佢任內首份施政報告，而發表方式亦同多名前特首唔同，並冇宣讀施政報告全文，只係宣讀內容撮要，而原本預計用一小時宣讀報告，最後只係用咗四十分鐘就完，今次可能因為時間太短，所以冇議員瞓覺，最多都係悶得滯玩吓手機。
唔止冇議員瞓覺，就連過往慣常出現嘅示威抗議、掟杯掟道具嘅民主派，尋日亦都變乖，冇任何集體抗議行動。只有人民力量陳志全（慢必）、工黨張超雄、街工梁耀忠、社會福利界邵家臻、朱凱廸同毛孟靜等民主派議員着黑衣、手持DQ四子嘅頭像進場。林鄭月娥到場之後，佢哋亦只係叫咗幾句「還我全民退保」、「DQ議員可恥」、「林鄭月娥唔好扮傻」相對溫和嘅口號。其他傳統泛民如民主黨（白鴿黨）、公民黨（公文袋）、專業議政議員都冇參與玩嘢。
劉小麗開記者會 陰魂不散
DQ四子入唔到會議廳搗亂，除咗羅冠聰正喺監獄服刑外，就只有劉小麗仍然陰魂不散咁喺立法會游走，佢喺邵家臻、張超雄陪同下，喺佢哋嘅議員辦公室樓層嘅會議室召開記者會，鬧爆施政報告對全民退休保障、墟市政策隻字不提，之前仲用唔同身份出席立法會公聽會嘅長毛同埋姚松炎就連影都冇。
喺違法佔領行動之後，市民對於立法會爭拗不斷早已感到厭倦，白鴿黨、公文袋都不得不漸漸回復正常化，而過往嘅「拉布三子」亦只剩下最溫和嘅慢必，相信加埋朱凱廸都獨力難撐，班民主派想搗亂立法會都搞唔起喇！