中環出更：團體聲討戴耀廷 論壇變鬧劇
大學校園內嘅爭議沒完沒了，浸大社關尋日喺校內舉行論壇，邀請佔領行動發起人之一、港大法律系副教授戴耀廷等人出席，途中遇上珍惜群組成員到場示威，主辦單位更一度邀請珍惜群組召集人李璧而參與論壇，其後更演變成鬧劇。
浸大社關尋日喺校內舉行論壇，討論點樣捍衞自主校園。除咗戴耀廷外，浸大社關並邀請學聯前副秘書長岑敖暉同埋民陣召集人葉志衍出席。喺論壇開始前，珍惜群組一行約十六人到場示威，揚言要捍衞校園，趕走毒瘤。
曾腰斬10分鐘
喺論壇開始後，戴耀廷發言約五分鐘左右，珍惜群組等人隨即踩場批評戴耀廷，指佢唔應該將政治帶入校園，令論壇遭腰斬約十分鐘。其後主辦方邀請李璧而一齊參與討論。直至約下午五時，李璧而自稱冇辦法討論落去，並要求浸大校方到場接請願信，最終校方有職員接收信。
浸大學生會會長劉子頎喺呢個時候現身，多次重申校長錢大康曾話學生可以喺校內討論港獨，感謝珍惜群組到場，同時希望佢哋離開，期間更一度引起混亂。約十五分鐘後，珍惜群組離開，論壇亦繼續進行，但岑敖暉後來卻因事而提早離開。
卓妮