中環出更：宓琪其：開心係最佳養生良藥
香港人工作緊張、壓力大，唔想未老先衰就要注重養生。新青會副會長吳聖傑早前嘅天然有機保健產品店開幕，保良局總理林承毅、香港福建同鄉會永遠名譽會長莊哲猛，以及珠寶設計師女兒莊莎娜等人都去撐場。卓妮見吳聖傑嘅太太宓琪其（Kiki）容光煥發，唔知佢平時食啲乜嘢養生呢？
Kiki笑笑口話自己平時食得好簡單，每日都會跑步、做吓瑜伽，最緊要心境開朗。好似今次開實體店忙到氹氹轉，屋企人問佢做乜咁辛苦，佢就話「讓自己健康係美德，讓他人健康係功德」，仲形容「開心」係世上最難買到嘅良藥喎。
駱英英早餐講究補氣補腦
講到好氣色，不得不提莊哲猛太太駱英英，事關佢嘅早餐好講究，將芝麻、麥片、枸杞、紅棗同核桃等攪碎，然後煮成糊仔，夠晒補氣補腦，難怪保養得咁好喇！
同場又見到從事香水同護膚品生意嘅陳錫銘同太太Sonia，唔知佢哋搜羅新產品時有冇見過古靈精怪嘅產品呢？陳錫銘話見過蛇毒護膚品，連試都唔敢試。Sonia就對大麻成分護膚品印象深刻，話相信亞洲都冇乜人敢做呢啲生意喎。
今次開幕將各界送贈花籃代金捐畀保良局，日後每賣一件產品亦會撥捐部分善款，所以林承毅都專程來支持。林承毅啱啱加入保良局第二年，佢笑言好忙，冇乜時間做運動，湊兩歲嘅囝囝就係佢最大嘅運動喇！
卓妮