政情：梁志祥教路 飲普洱茶要分「生熟」
香港人經常去酒樓飲早茶，但係真正識得飲茶嘅又有幾多人呢？立法會議員梁志祥近年就迷上普洱茶，得閒北上收集靚茶葉，又會買溪水去沖茶。佢又教路話朝早飲「生茶」可以提神，清醒腦筋應付工作，夜晚就應該飲「熟茶」安神，可以幫助入眠喎。
提神助眠 功效不同
普洱茶點分生同熟呢？梁志祥話生茶係摘咗茶葉之後只作約略手炒，熟茶就係經過人工發酵而成。而兩者最大分別，係生茶味濃，只適合朝早飲，梁志祥試過夜晚飲生茶，結果成晚瞓唔到，「仲勁過飲咖啡」；至於熟茶就相對較淡味，適合臨瞓前飲。
講究茶葉之外，用乜嘢水嚟沖茶都好重要。梁志祥會專登喺廣西買樽裝山溪水去沖茶，佢話溪水味道有別自來水，如果再講究一啲，就要用鐵壺去煲水，啲水先會夠鮮甜咁話。