中環出更：白鴿紛退黨 再走兩個
繼早前南區區議員區諾軒宣布，退出加入咗七年嘅民主黨（白鴿黨）後，日前亦都傳出沙田區議員、同樣已加入白鴿黨七年嘅陳諾恒申請退黨。除咗區、陳之外，原來離島區議員郭平早前亦退黨，根據區議會嘅網頁，郭平「所屬政治聯繫」方面冇填上任何黨派。郭平回應話喺今年六月已退出白鴿黨。
陳諾恒：一定唔入建制
陳諾恒喺上星期五申請退黨，其後亦退出白鴿黨嘅WhatsApp群組。佢話自己退黨同任何人或組織無關，而係經過一連串嘅思考，想放低政黨包袱、靜心做好地區事務，因此退出白鴿黨。佢仲話爭取民主嘅心同立場，唔會因退黨而有任何動搖。至於會唔會加入其他政黨，佢就話一定唔會加入建制陣營，暫時亦對其他黨派未感興趣。
陳諾恒喺一一年區議會選舉中首次出戰，喺沙田秦豐區勝出成為區議員，四年後仲以超過三千五百票，大比數拋離對手成功連任。沙田區議會三十八名議員當中，有十九人係非建制派，陳諾恒退黨後，白鴿黨喺該區就得番六個區議員。多年來，沙田區議會都有區議員退出白鴿黨，連同陳諾恒在內，該區至少有三個區議員係白鴿黨前成員。
卓妮