中環出更：重遊荔枝窩梁福元憶當年釣魚醫肚

新界鄉議局舉行一系列導賞活動，走遍多個新界景點，而尋日遊東北印塘就係頭炮，仲踏足將有民宿計劃嘅荔枝窩，成功吸引沙頭角鄉事委員會副主席曾玉安等鄉紳參加，連鄉議局主席劉業強、商務及經濟發展局副局長陳百里都參與其中。

梁福元就話四十年前去過荔枝窩露營，當時因缺食物而去碼頭釣魚，結果收穫非常豐富，難怪佢自誇新界人適應力強，唔怕餓死喇！不過，除咗話當年，梁福元都想去視察民宿計劃，但問到會唔會考慮將民宿引入元朗，佢就話政府條例嚴格，睇嚟佢暫時無意喎。

陳百里（左）同劉業強一齊為參觀荔枝窩作準備。

曾玉安擔當導賞員，落力介紹荔枝窩。（陳宛彤攝）

陳百里捱得熱 鄉郊遊無難度

另外，梁福元嘅兒子、元朗區議員梁明堅亦有同行，但就唔見佢兩個囡囡。梁明堅透露太太病倒無法參加，得佢一個太難照顧兩個囡囡，所以無得一齊去玩。但佢就話囡囡鍾意戶外活動，其中四歲嘅大女已經學識游水，仲學緊馬術添，比佢當年十二歲學馬術仲早。

至於外表斯文嘅陳百里就話以前做區議員時，經常着西裝行足廿八層洗樓所以捱得熱，不過就強調係以前嘅事，但見佢全程都行得輕鬆，睇嚟毫無難度。而佢對鄉郊旅遊都唔陌生，仲話近年旅客玩得深入咗，所以未來嘅旅遊政策都要考慮呢方面。難怪佢今次會實地考察喇！

卓妮