政情：新東補選 李世榮做「保彪」
沙田區議員李世榮近期受腰患困擾，兩三日就要去睇脊醫治療，而且為期幾個月，雖然情況有好轉，但距離痊愈仍有排。不過，佢話近期要改行做保鏢喎，究竟搞邊科？
其實李世榮所講嘅係「保彪」，即幫助盛傳將會代表建制派出選明年三月舉行嘅立法會新界東補選嘅鄧家彪（Bill）。今次係佢繼上年為代表建制派參加新東補選嘅周浩鼎後，再次幫建制派候選人喺新東抬轎，睇嚟佢都好有助選經驗。眾所周知，阿Bill過往主要喺離島區服務，李世榮都承認阿Bill對新界東唔係太熟，所以佢會集中喺呢方面幫吓手咁話。
話時話，李世榮曾經參加民建聯（民記）黨內初選，希望代表該黨參加呢場補選，但投票結果仍未公布，阿Bill就加入民記，仲跑出去參選，唔通李世榮真係咁大方？佢就話同阿Bill無介蒂，因為喺初選論壇上已明言願意讓位畀阿Bill喎！依家見佢捱住腰痛都要幫手，睇嚟真係心甘情願喇！