中環出更：張曼莉去立會 劉富生教「逃生」
新一屆問責團隊近乎齊腳，年僅二十八歲嘅創新及科技局政治助理張曼莉，尋日首次以政助身份到立法會熟悉環境。保安局政治助理劉富生就贈佢「生存秘笈」，教佢喺立法會大樓嘅逃生路線！
被創科局局長楊偉雄形容口才甚好嘅張曼莉，主要工作係聯絡政黨同議員助理，尋日佢趁議員齊人，去到立法會周圍同人打招呼。呢名八十後新手政助話，今次係第一次以工作身份嚟立法會，承認需要多啲時間適應。同場嘅劉富生自二○一二年起就開始擔任政助，經驗相對豐富得多，張曼莉亦有向呢位前輩請教，劉富安就分享保護自己嘅方法，嗱嗱嗱，講緊嘅唔係政壇求生術，而係走火警時嘅逃生路線呀！
李惠返新工 首要打招呼
另外，傳媒出身嘅特首辦特別助理李惠亦首次以新身份現身立法會，吸引大批行家影相。李惠話啱啱開始返新工，所以比較忙，依家首要任務係同議員打招呼，通知佢哋自己轉咗工，唔再係記者喇，又話被傳媒行家圍住嘅感覺好怪，相信要時間適應一下喎。
卓妮