政情：有相為證：陳家強偕好友 遊法國打高球
依家喺科技大學執教鞭嘅財經及庫務局前局長陳家強最近飛咗去法國，同一班好友去歎世界。佢日前喺社交網站貼文，話經過二十小時行程，佢同香港工業總會好友由香港去到法國波爾多，當然要把握機會快啲去葡萄酒莊畔揮桿。
係中學師兄弟
根據陳家強貼出嚟嘅相片顯示，同行仲有工總名譽會長鄭文聰、香港電子業商會副會長嚴玉麟等人，亦有佢揮桿打高爾夫球嘅英姿。唔講唔知，原來佢哋仲有一層特殊關係，就係同樣係聖若瑟英文中學嘅師兄弟，三人仲搵埋同學Andrew影咗張合照。睇嚟陳家強離開咗官場後，似乎無壓力兼且一身都鬆晒喎！