政情：八網難逃：迎月夜合照 一舊雲盼莫嘉嫻「快啲團圓」
中秋節最緊要人月兩團圓，民主黨（白鴿黨）立法會議員黃碧雲（一舊雲）同盛傳將會加入白鴿黨嘅民協前主席莫嘉嫻，不約而同喺社交網站上載咗佢哋前日迎月夜齊齊喺馬頭圍同當區居民迎月嘅照片，莫嘉嫻喺貼文最尾附上hashtag「入黨啦入黨啦」，一舊雲亦都特登hashtag「和莫嘉嫻在一起」。莫非佢哋真係已經「團聚」，莫嘉嫻加入白鴿黨已成事實？
莫稱短期內宣布去向
一舊雲接受查詢時話，莫嘉嫻尚未入黨，但坦言「希望佢快啲」，相信「總有團圓嘅一天」。莫嘉嫻則指，最近認識咗好多白鴿黨朋友，大家仲互相了解緊，而前日係佢哋首次一齊搞活動，佢仲話短期內就會宣布去向添。