政情：盧偉國 劉天成合奏 琵琶二胡妙韻傳港鐵
工程界立法會議員盧偉國精通樂器，喺政圈係公開秘密，最近一次就喺前日，盧偉國現身港鐵中環站一行多人一齊合奏，當中包括港鐵車務總監劉天成。唔講唔知，原來盧偉國同劉天成識咗好耐，而且甚有淵源，同係港大工程舊生會（舊生會）嘅前會長。
組中樂隊為乘客表演
負責彈琵琶嘅盧偉國話，今次唔係首次喺港鐵表演，又透露劉天成係二胡高手，以前大家都有合作，包括喺舊生會活動多次合奏。
盧偉國又話，知道港鐵有唔少年輕工程師都係音樂人，因此一齊組成中樂隊，每年都有一、兩次喺港鐵中環站為乘客及市民表演。唔知盧偉國同劉天成下次會唔會跳出港鐵中環站，轉戰另一個人流多嘅港鐵站，再次合作大顯身手呢？