我有正能量：每堂轉籃球 授「平衡」之道
兩架細小的單車和一個籃球，是Nelson每次開班都會出動的「法寶」，每次他都會先轉動籃球，利用旋轉的力量將籃球維持在右手食指之上，他認為這個動作可以更清晰地向小朋友解釋「平衡」的定義。
小朋友睇完示範更放膽
「轉波呢個動作我每堂都會做，做畀每一個小朋友睇，佢哋睇到會覺得好神奇，原來咁大個籃球，只要平衡得到就可以喺手指上面唔跌落嚟，其實踩單車嘅原理都係一樣，保持有動力同平衡就唔會跌。」Nelson指，當小朋友看到「轉籃球」的示範後，他們大多會比看之前放膽，萬試萬靈。
「另一個令佢哋易啲學識嘅方法，係我會喺前面或者側面托住架單車陪佢哋行，等佢哋知道我幾時放手。」Nelson指，大多數家長教導子女踩單車時，或會從背後推他們出去，但他認為此舉反而會令子女因看不見爸媽而無安全感，亦因此無法找出平衡點。