中環出更:林亮搞「講讀」 史立德嚇到O嘴

做珠寶生意嘅仁愛堂總理沈運龍(Aaron)尋日為首間自家品牌零售店舉行開幕儀式,好多政商界名人去撐場,包括行政會議成員林健鋒嘅爸爸、「中國變形金剛之父」林亮。一向多計仔的林亮大大聲話要成立「講讀學會」,仲叫同場嘅中華廠商聯合會副會長史立德、香港玩具協會榮譽主席陳明耀「科水」做金主,嚇到佢哋O晒嘴,以為老前輩做乜支持同「講讀」同音嘅「港獨」。其實林亮講緊幫助學生哥的獎學計劃啫,認真搞笑。

林亮話,其實成立呢個會係想講吓讀書、識字同埋做人道理,希望資助住喺劏房,家境清貧但品學兼優嘅學生,等佢哋讀好書,明白做人嘅道理。不過林亮太太Shelly就踢爆,呢個主意係前晚先至諗到,唔知係咪真喎!史立德被林亮嚇咗一跳之後,回一回神,都笑稱呢個諗法太震撼。

沈運龍話香港租金貴

講番開幕現場,到賀嘉賓仲有香港明天更好基金行政總裁鄧淑德、珠寶設計師方潔然、商務及經濟發展局前局長蘇錦樑等人。Aaron見到咁多人嚟捧場都好開心,事關今次係佢第一次喺香港開零售店,而香港會同時開兩間,中東阿布扎比亦開咗一間。Aaron話香港租金雖然畀高峰期下跌好多,但係仍然好貴,比阿布扎比貴一倍以上,所以最緊要有多啲市民幫襯支持。

蘇錦樑笑稱還老婆債

至於離開政府近三個月嘅蘇錦樑,原來就差唔多玩足三個月,佢笑稱其實係還老婆債,話從未對住老婆咁長時間,其後更自爆都有人搵佢做嘢,但佢仲未玩夠,遲啲仲要返澳洲,因為阿女生BB,老婆去做陪月,佢就去陪老婆,繼續還老婆債喎。

卓妮

第一手消息請下載on.cc東網iPhone/iPad/Android/Windows Phone Apps