政情：鄧家彪鄭泳舜預告拍住上
深水埗區議員鄭泳舜（Vincent）同離島區議員鄧家彪（Bill）近期頻頻孖住現身，事關盛傳兩人將會代表建制派參加未來九龍西同新界東嘅立法會補選，相信未來佢哋有更多同場嘅機會，但佢哋到底夠唔夠合拍呢？
認識十幾年多嘢傾
Vincent形容佢哋為兩兄弟，未來亦都會搵大議題一齊合作、一齊努力，而兩人更係同一屆當選區議員，至今已經認識十幾年，直言同阿Bill多嘢傾咁話喇！
而阿Bill喺七月份加入民建聯，自言工作比過往忙碌，因為有啲議題喺過往未有涉獵，所以現時多咗參與。不過，佢就認為同Vincent所面對嘅情景有所唔同，因為對方過往集中地區層面，現時需要盡快尋求知名度，而自己就係「半紅不黑」喎。雖然有所分別，但兩人都會多作交流，嘗試搵共通點一齊試做。
有乜嘢好做？阿Bill隨即就諗到新橋，指Vincent鍾意跑山游水，可以考慮帶佢去新界東喎，睇嚟兩個同場機會陸續有嚟。