政情：想發達唔一定讀「神科」 陳繁昌教路：興趣行先

華爾街多重數理

陳繁昌話學生入大學選科，最緊要係興趣行先，有好多出路，唔一定要讀「神科」先可以賺大錢，例如華爾街其實好多人用數學同物理，而對沖入面有好多數學物理嘅思維，如果請一個數學家同物理學家，再教佢金融，係容易過請一個讀金融嘅，再教佢數學同物理，因此依家著名科技公司都同投行爭人才。

佢又話依家嘅學生對科目唔係好認識，以為選科係要同賺第一份錢有關，只要睇長遠啲，就會明白發達唔係只有一樣選擇，只係社會壓力令成績好嘅學生覺得唔讀「神科」就嘥咗咁，家長普遍亦覺得讀「神科」好，其實做得好就有機會搵到錢，唔應該本末倒置，而社會發展需要唔同方面嘅人才，依家睇落冷門嘅科目，隨時幾年後又會好有需要有關方面嘅人才。