中環出更：貝鈞奇：音樂運動息息相關
音樂同運動表面上好似冇乜關係，但其實息息相關。早前卓妮見到香港足球總會副主席貝鈞奇，佢就話好多運動都會配合音樂進行，除咗跳舞同健身，古代連打仗都會用戰鼓嚟激勵士氣o架！
香港新進國際級女鋼琴家黃子芳早前首次喺香港舉辦大型協奏曲音樂會，包括貝鈞奇等唔少城中名人都有捧場，貝鈞奇都鍾意聽音樂，仲話運動同音樂的關係好密切，除咗好多運動盛事開幕閉幕都會有主題曲外，音樂節奏仲會影響住運動嘅速度，聽住音樂跑步健身都可以維持得耐啲啦！佢仲話連印度摔跤都會有佢哋嘅音樂喎。唔通佢睇完早前嗰套印度電影後印象深刻？
呢日音樂會與首度來港嘅烏克蘭國家功勳廣播交響樂團演奏，活動所有收益扣除成本後，撥捐予大中華文化全球協會同傳藝慈善教育基金會作慈善用途，以推廣中華音樂文化薈萃。香港傳藝中心校長吳子文同太太蔡雪亮、名媛兼大慈善家趙曾學韞、仁愛堂前主席黃達東等都有出席，立法會議員陳恒鑌笑言，細個冇機會學樂器，但都好希望將來退休之後可以學番一種。揀邊種樂器？佢話學二胡好，因為得兩條線夠簡單喎。
郭翠華話藝術應融入生活
本地著名時裝設計師郭翠華同樂善堂主席郭予宏夫婦亦有到場感受音樂氛圍，郭翠華認為藝術唔應該只困喺博物館，應走出框框融入大眾生活。
郭予宏就對較早前網上流傳有地盤工人喺商場即席演奏鋼琴嘅表演大感讚嘆，指好多人可能因各種原因未能發揮興趣所長感可惜。
卓妮