中環出更:彭少衍籌款新橋多 秘訣係行山

沙田馬場尋日舉行博愛盃賽事,博愛醫院董事局成員傾巢而出,氣氛好高漲。博愛主席彭少衍上任以來推出唔少籌款新項目,例如十一月初舉行老夫子慈善跑,到時大家都會着上漫畫人物啲衫落場跑,十二月仲會舉行「文物行」探索元朗村落及文化。佢話目的係希望用新嘅方式,令有近百年歷史嘅博愛有一番新形象。

講起創新,彭少衍仲自創另類董事會,即每個月同董事局成員及同事齊齊行山,一邊聯誼一邊度橋,難怪佢諗到咁多籌款嘅新橋喇!佢話行山氣氛輕鬆啲,唔使坐低開會咁嚴肅。咁今年咪係佢呢世人行得最多路嘅一年?彭少衍笑稱係佢最忙嘅一年就真。

藍國慶年底訪非洲 太太冇詐型

博愛永遠顧問藍國慶同太太Mina都有入場。藍國慶啱啱做咗非洲國家塞內加爾駐港名譽領事,年底會去進行官式訪問,希望為港人開發新商機或旅遊熱點。由於香港冇直航班機,所以會喺法國轉機,正努力增肥準備造人嘅Mina就唔去嘞,因為去非洲要打好多預防針。不過佢哋會一齊出發,然後Mina留低喺法國等老公去完非洲再會合。嘩!可以喺法國盡情購物幾日,難怪Mina冇詐型喇!

同場仲有博愛總理楊亞媛同梁天富,楊亞媛生意瓣數多,其中包括同內地政府合作打造一帶一路絲綢小鎮,即係按各國嘅建築特色起屋,畀去當地投資嘅一帶一路商人多啲歸屬感,聽落幾有諗頭。梁天富講起半歲大嘅囝囝就笑得合不攏嘴,就算尋日湊仔湊到朝早六點都話唔攰喎。

卓妮

第一手消息請下載on.cc東網iPhone/iPad/Android/Windows Phone Apps