政情：霍震宇趁後生周圍去玩
已故全國政協常委霍英東長房三子霍震宇最近少咗喺香港公開露面，早幾日佢現身廣東社團總會嘅酒會，梗要問吓佢最近忙啲乜？霍震宇笑笑口話，趁住後生仲玩得就多啲去玩，最近就滑咗幾次雪。佢話自己今年六十三歲，仲可以滑幾多年呢？滑到七十歲都唔知仲得唔得喎。唔知佢因咩事咁大感觸呢？
百忙中都要陪吓媽媽
雖然話要及時玩樂，但霍震宇呻話工作忙，唔可以放低唔做走去玩耍。此外，佢都畀多啲時間同屋企人一齊，最緊要係陪吓媽媽。佢話老人家鍾意飲茶，所以就陪佢去飲茶、傾吓偈。
講到最近有新款手機採用人臉識別解鎖，成為用家熱門話題。霍震宇就話人臉識別唔算係高科技，廿年前佢已有朋友做緊呢門生意，依家唔少支付系統、門鎖都有用人臉識別技術，仲話科技進步係大勢所趨，依家唔用遲啲都要用，所以佢唔會排斥咁話。