中環出更：郭振華擔心機械人主宰一切
工業界唔係淨得「廠佬」，其實好多做工業嘅都係隱形科學家。早前卓妮見到香港工業總會（工總）主席郭振華（Jimmy），做開表面處理化工嘅佢話，呢行好多工序已由機械手代勞，包括化驗，雖然唔係成個機械人擺喺度嗰種，但基本上同運用緊機械人冇分別。
未來工種要高知識創意
現時愈來愈重用人工智能及機器處理繁瑣、重複及危險嘅工作，會唔會擔心有機會被黑客入侵？Jimmy就話呢個風險喺佢哋預計之內，所以有多重措施預防。至於將來會唔會出現好似未來戰士咁嘅劇情，佢就話有啲發明家真係會有種狂熱，不斷追求科技新突破，有啲於發現情況失控時就會停止研究。好似之前有交談機械人因發展出自己語言而被關閉，佢覺得當生活與機械人密不可分，連市面上周圍嘅侍應都係由機械人做嘅時候，就需要擔心喇。
Jimmy仲話，將來人類嘅工作種類都需要高知識及創意，唔用腦思考嘅工作變得同機械人冇分別，所以大家要經常問自己「點解做唔到」以求突破。
鄭文聰設計自己套西裝
呢日係工總轄下珠三角工業協會舉行就職典禮，協會主席葉中賢、工總前主席鄭文聰、會員陳偉傑及青年工業家執委張綺媚都有出席。見鄭文聰套西裝好特別，原來係佢自己設計，口袋位置有條假袋巾，可隨時收起方便工作、休閒場合兩用，夠晒創意。
做印刷嘅陳偉傑就話，近年行業轉變好大，佢就慢慢轉型做埋市場推廣，有員工仲變埋網絡紅人添！
卓妮