政情：葉劉：唔做運動似冇刷牙
都市人愈嚟愈注重健康，新民黨主席、立法會議員葉劉淑儀亦唔例外，佢尋日出席「運動改變人生大獎」頒獎禮暨就職禮時更形容「唔做運動好似冇刷牙咁」！
怕太陽曬去健身室
葉劉自爆細個唔鍾意做運動，爬繩、跳木馬等等都唔鍾意，但後來工作壓力大就開始做運動，不過就怕太陽曬，所以都係去健身室，盡量會保持每星期去兩、三次，包括有半小時帶氧運動，亦有跟教練訓練，所以全身肌肉都會訓練到。佢又話習慣咗做運動後，就覺得運動可以減壓，而自己嘅體重一直都保持到冇乜改變，而且體檢見到血壓等等都好好。
講起健康，葉劉唔止會做運動，亦好注重飲食，佢話自己早餐都係食all bran、脫脂奶同莓類，仲被阿女笑自己食樹枝添！不過阿女就陪唔到佢食早餐嘞，因為阿女工作好辛苦，成日夜晚凌晨兩點先返屋企，朝早八點又要返工嘞！