政情：區諾軒退黨許智峯連任危危乎
繼林子健「釘書釘」鬧劇後，外號白鴿黨嘅民主黨再度爆發危機。該黨重點栽培多年嘅新生代成員、南區區議員區諾軒，尋日凌晨突然宣布退黨。各界關注佢會否轉投立場較為接近嘅社民連或香港眾志，甚或出戰明年三月嘅立法會港島區補選同二○二○年嘅立法會換屆選舉。事件亦凸顯現任白鴿黨港島區立法會議員許智峯，喺黨內缺乏領導能力同親和力，區內老嫩樁腳先後離巢，影響白鴿黨喺二○一九年區議會選舉嘅表現，佢本人想連任立法會亦倍添壓力。
民間人權陣線前晚進行改選，最後選出來自大專政改關注組嘅葉志衍，接替任期屆滿嘅區諾軒出任召集人。區諾軒卸任後隨即喺社交網站宣布，基於「對政治的執着」退出加入咗七年嘅白鴿黨。佢又話會喺退黨後「團結不同光譜的人」、「於社區協助建立組織力量」，意味佢並非就此退出政壇或純粹做個獨立泛民區議員，而係有其他搞作。
外界關注區諾軒退黨後，會唔會轉投同佢關係良好嘅社民連或眾志，因為呢兩個激進派政黨嘅多名主要成員，唔係坐緊監就係等緊坐監，有票冇人，唔排除會招攬有一定知名度同地區實力嘅區諾軒加盟。區諾軒接受查詢時直認社民連搵過佢入黨，又話會喺補選中支持眾志重奪港島議席，但暫時佢都係想保持獨立身份，唔會加入其他政黨。
區諾軒同另外兩名白鴿黨南區區議員羅健熙及柴文瀚，合稱「南區三乳鴿」或「區羅柴集團」，一直係該黨嘅重點培育嘅對象，但喺舊年嘅黨內出選爭奪戰中，爆冷輸咗畀表現更激進、更識得博出位嘅中西區區議員許智峯，最後許亦成功進身立法會。
許人緣麻麻 被指用人唯親
今次區諾軒退黨，標誌「區羅柴集團」正式瓦解，但唔代表許智峯未來就可順風順水角逐連任。須知許智峯黨內人緣一向麻麻，唔單止其他區嘅黨友，就連中西區內嘅老鴿前輩及同期戰友都唔妥佢，質疑佢用人唯親，剩係信任及提攜自己啲心腹同助理。
早前莊榮輝等多名中西區黨友，已率先轉區到新界東另謀發展。依家身為南區「票王」嘅區諾軒亦退黨，令人憂慮來屆區選，白鴿黨喺港島區仲有乜嘢人可以出戰。再加上眾志等更激進嘅本土自決派競爭，斷咗幾條樁腳嘅許智峯，好難再單靠瞓吓街、搶吓咪就當選。