政情：梁栢賢鍾情「邪惡」餐蛋菠蘿包
菠蘿包係香港人嘅至愛，除咗菠蘿油之外，仲有唔少人諗出好多花款，而醫院管理局行政總裁梁栢賢（PY）都係其中之一，佢試過加入多款餡料之後，都係覺得餐蛋菠蘿包最正，仲話「實在太邪惡啦！」
PY日前喺社交網站Facebook上載咗一張餐蛋菠蘿包嘅照片，原來佢都好鍾意食菠蘿包，更嘗試過加入唔同餡料入去添！佢貼文話曾經試過好多種食菠蘿包嘅方法，包括齋菠蘿包、菠蘿油、菠蘿包叉燒burger（漢堡）等等，但係最好食都係呢個餐蛋菠蘿包。
睇落餐蛋菠蘿包嘅賣相確實唔錯，餐肉同雞蛋都煎得啱啱好，好似好鬆軟咁，不過，作為醫生嘅PY都提醒自己：「不過，唔可以經常食，因為實在太『邪惡』啦！」
網友大讚：係食家
呢個貼文一出街，好多網友即時起哄，當中唔少網友都直指PY係食家，仲話餐蛋菠蘿包好正，亦有網友話「本身菠蘿包已經『邪惡』，加埋餐蛋『邪上加邪』」，就連身兼精神科顧問醫生嘅立法會前議員潘佩璆都加把嘴，話「唔邪惡就唔好食……」