中環出更：綵排惹聯想 麥美娟掛雙牌頭？
再有工聯會（工記）核心掛上「雙牌頭」，步工記離島區議員鄧家彪後塵加入民建聯（民記）？話說民記尋日下晝喺Facebook上載一條最新影片，全長唔夠一分鐘，顯示該黨一批立法會議員為幾日後舉行嘅黨內二十五周年大型活動進行練歌，以及舞台「走位」綵排，最令人意外嘅係，其中一幕係出任議員快將六年嘅工記麥美娟（Alice），竟然有份戴上耳機練歌，莫非Alice亦已靜悄悄加入民記？
正所謂合久必分，政圈都習以為常，好似工記同民記以前喺選舉合作無間，但工記喺二○一二年同民記逐步分家，希望可以爭取更多議席，但喺舊年立法會選舉失利後，早前鄧家彪已加入民記，若果Alice又係咁嘅話，咁分家就變咗名存實亡嘞！
只係一場誤會
據悉，呢個只係一個美麗的誤會，Alice冇加入民記，仍然係工記一員；除此以外，工記多名議員亦有參與練歌綵排，因為時間問題，冇聯同民記一批議員一齊綵排，因此先冇喺綵排片段亮相，避過引起外界嘅無限聯想。
卓妮