立法會財務委員會喺上個立法會期最後階段，審議涉及三十六億元教育新資源撥款期間，建制派首先集體離開會議室，據知建制派認為若因為民主派拉布，而令教育新資源撥款未能通過，民主派就須負全責，所以建制派放手同對方「鬥大」，民主派即時進退失據，民主黨黃碧雲更加收回一項臨時動議，避免「玩大咗」令教育新資源撥款難產。
雖然建制派當日看似「奇襲」成功，出番啖氣，但據知當日訊息亦相當唔清晰。話說當日建制多個黨派代表開會後，突然決定由民建聯同工聯會離開會議室，唔會就是否處理臨時動議而投票，但係當呢啲臨時動議被通過，變成需要處理後，到底離場議員要唔要重返會議室，就呢啲臨時動議投反對票，就一度未有清晰指示，部分人喺當時亦唔知係咪應該返入會議室投票。
有建制派事後反映，認為唔應該喺指示咁唔清晰嘅情況下玩集體離場，因為咁樣太危險，隨時令到政改經典甩轆事件重現，到時就大件事。甚至有人私下認為，咁樣出啖氣，又唔會令到選票增加，如果出事，反而會令到選票流失，到時就真係得不償失嘞！