政情：徐英偉膺副局樓王

力壓3熱廚房新人

Caspar接受查詢時話，佢五個物業之中，兩個位於加拿大，另外三個就集中喺九龍深水埗區。買咁多物業，係因為兩個仔先後出世，地方唔夠住，所以喺同區添置物業搬大屋。近年樓市熾熱，樓價愈嚟愈貴，所以近兩年佢已無再入貨。而教育局副局長蔡若蓮同樣有樓在手，個人擁有油尖旺區一個自住用途嘅住宅單位，另一個位於大埔嘅單位就同丈夫潘熙恩共同持有，用嚟畀家庭成員居住。

講到明白買磚頭嘅重要性，睇嚟公務員比較有心得。三位熱廚房新人包括區志光、廖振新同陳帥夫，都係出身於公務員體系，而佢哋無獨有偶，全部都已經「上車」。其中廖振新報稱喺元朗擁有一間村屋同一幅農地。咦？有農地？唔通佢唔怕重蹈財政司司長陳茂波喺發展局局長任內被揭發有農地嘅覆轍，畀人質疑有利益衝突？

咪緊張，廖振新其實申報咗村屋同農地係佢已過身嘅父親留低嘅遺產，而佢自己只係繼承咗六分之一業權。據悉廖振新仲有五位兄弟姐妹，所以均分為六份，遺產仲辦理緊，其實未正式擁有，不過佢穩陣起見，申報咗先。

至於區志光就鍾情港島中西區，喺區內買咗三個單位，其中兩個仲用嚟收租添！而陳帥夫就喺大埔區持有一自住單位。

至於「無殼蝸牛」嘅副局、政助，就有商務及經濟發展局副局長陳百里、創新及科技局副局長鍾偉強、發展局政助馮英倫同環境局政助區詠芷，佢哋上屆政府已加入問責團隊，人工理應唔錯，但最新資料顯示四人仍然無物業。唔通好似Caspar咁講，近年樓價太高，所以唔敢入市？