政情：賴嘉汶遇過幾個差外傭

人夾人，請到夾得嚟嘅外傭，有時都講啲彩數。至於點樣處理違規嘅外傭，更加會令唔少僱主相當頭痛！民建聯「小花」賴嘉汶（Apple）屋企以前都請過好幾個外傭，但係試過有菲傭就喺廁所食煙同鍾意去夜蒲，仲試過請過印傭偷着家人嘅內衣影相添！真係講起都令人打個突！

Apple強調，其實屋企都曾經請過一啲工人姐姐係好錫自己，但佢哋離鄉別井打工，好多喺家鄉都有個好細嘅小朋友，所以做幾年就會回鄉湊小朋友，咁屋企又要請過第二個，佢屋企就有啲唔好彩，除咗請過有菲傭喺廁所食煙同鍾意去夜蒲，仲試過發現印傭有啲相，係着住家人嘅內衣影嘅，家人發現嘅時候都大為震驚。

問佢有冇即刻炒咗呢啲工人姐姐，佢就話冇，因為佢屋企都比較腍善，通常都係對方唔續約先會換人，後來自己都長大，覺得應該要分擔家務，屋企都冇再請外傭嘞！