中環出更：侯志強以錢喻摩天輪 「有好過冇」
中環海濱摩天輪避過拆卸嘅危機。卓妮日前喺沙田馬場見到上水區鄉事委員會主席侯志強，佢就笑言摩天輪同錢一樣，「有好過冇」，認為雖然現今社會摩天輪對本地市民未必有好大吸引力，但對遊客嚟講始終係一個景點，亦都老少咸宜。
問起幾時坐過摩天輪，侯志強話佢個仔就有帶佢啲孫去坐過，而佢自己上一次坐摩天輪已經係好耐之前嘅事，講到最印象深刻嘅，佢話一定係以前荔園嗰個，而最靚嘅佢就覺得係倫敦眼喎。
梁高美懿鍾意刺激活動
馬會大董梁高美懿就話自己冇坐過香港海濱嗰個摩天輪，不過就坐過好多唔同地方嘅，而佢都幾鍾意啲刺激嘅活動，曾經喺澳門同英國都有玩過要用鋼索輔助的空中步道，雖然摩天輪未必吸引到佢，但佢都覺得香港有個摩天輪唔錯。
愛沙尼亞駐港名譽領事林建康（Matthew）就透露，佢辦公室望住中環海濱摩天輪，話好多地方例如倫敦泰晤士河同新加坡濱海灣旁嘅摩天輪都望到河或海濱，香港就有維港，如果拆咗似乎有啲可惜，好似少咗啲嘢咁喎。
轉頭仲見到仁愛堂副主席陳達華與太太李玉佩同家人，陳達華笑笑口自爆係全家唯一一個畏高嘅人，所以佢唔會坐摩天輪，平日就連坐飛機都會盡量揀非窗口位。大律師譚健業就話預計傾得掂牌照問題就應該唔使拆卸個摩天輪，否則就會連帶附近美食車的生意都受影響，因為平日美食車停泊的地點已經唔多嘞！
卓妮