政情：公民講場：垃圾山擾民霸路食環署唔踢唔做

近日喺觀塘碼頭近基業街垃圾站出現垃圾山，唔單止佔據行人路，有部分行車線都堆咗垃圾，嚴重影響途人同駕駛者安全，亦對居民嘅健康構成影響，但食物環境衞生署就歎慢板，唔去清理垃圾，終於被本報連續兩日報道被批後，食環署尋日終於認衰去補鑊，派清潔工去清走現場大部分垃圾。由呢件事睇得到，食環署真係唔踢唔郁，如果因為垃圾問題影響到居民健康，署長劉利群肯定孭鑊。