中環出更：梁繼昌 莫乃光去水塘睇發電
呢排天氣炎熱，留喺室內歎冷氣就最爽，但立法會會計界議員梁繼昌（Kenneth）就喺大熱天時拉埋資訊科技界議員莫乃光（Charles）去石壁水塘，原來佢哋約咗水務署工程師去睇嗰度嘅浮動太陽能發電裝置。Kenneth話早前颱風「天鴿」吹襲香港同澳門，澳門仲一度停電，令佢體會到能源嘅重要性，覺得香港都應該關注可再生能源嘅發展喎。
浮動太陽能 有生產潛力
Kenneth早前拉埋Charles去石壁水塘，當日有攝氏卅四、五度，連佢都忍唔住話好鬼熱。Kenneth話香港有十七個水塘，如果全部撥出十分一地方安裝呢啲太陽能發電裝置，一年可以生產二點五億度電，等同水塘泵房用電量一半，係好大生產潛力。政府成日話冇地搞可再生能源，利用水塘就唔會有土地問題喇！
Kenneth又話石壁水塘嘅裝置今年三月已經裝好，花費約六百萬元，估計可以用五至六年，就算打風都冇事，似乎又幾穩固咁噃。不過依家只得石壁水塘同船灣淡水湖有呢啲裝置咋，要個個水塘都有，真係唔知等幾耐？
卓妮