政情：吳文華發靚相幫朋友「翻生」
現代社會醫學昌明，人均壽命都延長，長者亦要好好規劃自己嘅退休生活。立法會前秘書長吳文華（Pauline）卸下立法會工作後成立社企，聘請殘疾人士設立名為we60.com嘅平台，固然忙到一頭煙，但亦不忘老朋友。佢尋日出席活動分享退休生活時話，自己有啲朋友退休後就「失蹤」，於是佢每日向佢哋用手機發送靚相同金句，終於令朋友「翻生」。
令退休者蒲頭
Pauline話有朋友自退休或家人離世後就冇再蒲頭，於是佢就係咁向朋友發訊息，傳一啲靚相同金句，終於令呢啲朋友「翻生」，出番嚟參加活動。佢又話就算退咗休都應該多啲出街，時不時邀請吓朋友去屋企飲吓茶，咁樣先可以鼓勵自己執吓間屋喎。佢又提到，佢嘅社企邀請唔少殘疾人士，要根據各人專長為佢哋設計工作，有時都覺得辛苦，例如有精神康復者記性唔好，就安排對方負責拍攝工作，結果對方影咗好多靚相，見到佢哋做嘢開心，自己都好開心。