中環出更：外國大隻男 手臂紋「劉慧卿」
外國人嚟亞洲紋身，不時都會因為將「騎呢漢字」紋上身而搞出笑話。近日就有網友發現，有一個身形魁梧嘅外國男人將民主黨前主席劉慧卿（卿姐）個名紋喺手臂上，有關相片更被放上網上討論區，就連卿姐都有留意呢張相，仲主動向朋友分享呢宗趣聞添！
可能係網上翻譯系統出錯
相片嚟自外國一段健身影片，正當片中身穿青綠色T恤嘅男人喺健身時摺起衫袖時，有金睛火眼嘅網友就發現，佢手臂嘅紋身竟然係紋上咗「劉慧卿」三個字！幅截圖之後被上載到網上討論區，有網友就笑言呢名外國男人可能係卿姐嘅男友，亦有人估計佢嘅女友可能亦係叫Emily，只係網上翻譯系統將「Emily」翻譯成「劉慧卿」，更有人發現若輸入「Priscilla」就會翻譯成「梁美芬」，難怪連網友都話自己「笑到傻咗」。
卿姐留意到呢宗趣聞之後，亦都主動向朋友分享，而消息一傳出後，更加有人問佢係唔係勾結外國勢力，卿姐就笑言「你都發癲嘅！」又叫大家笑吓就算。被問到佢識唔識呢位男士時，佢直言「Of course not（當然唔認識）」，仲用咗幾個表情符號表達佢嘅心情，可能卿姐都唔知呢次係好嬲定好笑！
卓妮