下屆區議會選舉將喺一九年舉行，唔少政黨都已經開始部署，最近有傳民建聯（民記）多次選葵青興芳區嘅梁嘉銘，將會轉戰青衣盛康區，繼承爸爸葵青區議員梁偉文嘅一席。但原來民記並冇放棄興芳區，佢哋負責荃灣同葵青區嘅立法會議員陳恒鑌（Ben）已經跨區撬咗個小花，疑似準備去打「老鴿」，即係當區議員民主黨（白鴿黨）嘅吳劍昇。

興芳區最近出現小花鄧麗玲派傳單，一問之下，原來佢原本喺九龍城做地區工作，做咗幾年，喺呢區服務咗約一個月，但佢就冇直接講係咪選呢區，淨係話「有個機會畀我去學習，我都會好努力去學習嘅」。

佢又話自己以前肥到唔係好想影相，仲笑指「可唔可以唔畀相你呀」，依家瘦咗差不多二十公斤，都係因為不斷企街站、家訪，慢慢瘦咗落嚟。佢又自爆依家廿八歲，仲係單身，屋企人都不斷催佢快啲拍拖，因為妹妹都已經結咗婚嘞，叫佢做地區工作之餘，都唔好忘記自己喎。

卓妮