政情：顏汶羽訪天文台冇風收
每逢有颱風逼近，相信唔少市民都非常關心會唔會有額外假期，亦都準備咗唔少防風措施。觀塘區議員顏汶羽喺前日帶團參觀天文台總部，更趁機八卦吓「天鴿」嘅風暴消息，唔知有乜嘢內幕消息可以提早知呢？
顏汶羽就話當日香港仍然未懸掛任何熱帶氣旋警告，而且「天鴿」同香港仍然有一段距離，所以當時天文台職員都唔知打唔打得成風，即係無內幕消息提早知囉！
上咗堂氣象知識班
不過，佢就趁機上咗堂氣象知識班，天文台職員就教佢要留意熱帶氣旋嘅路線同強度，同埋與香港位置，若然喺東面登陸去到香港以北就會有所減弱，風力會較位於香港南面嘅風暴弱咁話，睇嚟佢長咗唔少知識喇！
另外，當日嘅參觀其實係一個親子活動，小朋友由小學至初中都有，而且，參加者數目仲唔少添！顏汶羽就話，要趁暑假為地區嘅小朋友舉行活動，仲可以提供埋學習機會，因為，現今嘅小朋友唔知道以前係以懸掛方式公布熱帶氣旋警告咁話喎。