政情：蕭嘉怡做政助白鴿傘兵勢搶三煞位

政圈一直盛傳Kathy會出任新一屆政務司司長政助，但係首輪副局長同政助名單卻榜上無名。尋日政府再公布三個新任副局長同政助人選，Kathy將喺九月一日履新，而原民政事務總署副署長陳積志出任民政事務局副局長、教育局局長政助施俊輝原職過渡至新一屆政府，佢哋都喺今日正式上任。

不過，新任財經事務及庫務局副局長陳浩濂，其原屬嘅山頂選區同Kathy嘅東華選區就要進行補選。須知山頂議席一向係自由黨囊中物，當中只係現任公民黨立法會議員陳淑莊曾勝出過一屆，所以自由黨都想喺補選攞番呢席。Kathy原屬嘅東華選區就一直係白鴿黨盤據，直到佢喺一一年區議會選舉中，擊敗角逐連任、本身為立法會前議員「AV仁」何俊仁胞弟嘅何俊麒，白鴿黨先被「飛」走。Kathy更由翌年起一直擔任當區區議員。

建制派搵人出選等同自殺

Kathy加入政府熱廚房，東華選區勢必引起一場爭奪戰，白鴿黨早已明言會搶位。有民記中人就話呢個係三煞位，唔易打，只係Kathy打番嚟呢，如果搵人出選等同自殺，亦冇諗過咁快要面對選舉，所以喺短時間內好難搵人出選，但都希望可以攞番呢個位，目前仍物色緊人選，可能仲要同其他建制派協調。

身兼中西區區議員嘅白鴿黨立法會議員許智峯話該黨對呢個議席好有興趣，但好大機會會派「新面孔」出戰，至於邊張新面孔仍未決定。換言之，何俊麒重奪東華機會甚微，唔知係咪擔心佢輸多一次呢？

許智峯亦話除咗白鴿黨對呢個議席有興趣外，都有其他民主派政團吼住呢個位，例如係一啲地區街坊組織、「傘後」團體。睇嚟白鴿黨分分鐘會被（界刂）票，想重奪議席都唔係話咁易。

溝通出錯 施俊輝遲咗接任

至於施俊輝點解會遲咗大半個月先接任教育局政助個位？據聞，佢之所以喺首輪公布唔到係因為處理程序時溝通出現問題，所以引致延誤。無端端多咗咁多假，可以陪多啲囡囡囉！