政情：博愛百周年主席 吳錦青跨代接班
城中各大慈善團體嘅董事局換屆，通常係當屆選出下一屆，但博愛醫院董事局最近就確認咗兩年後嘅主席，事關屆時係博愛成立一百周年嘅大日子，呢位一百周年主席就係博愛副主席吳錦青。
邀人瑞共度慶典
早前喺一個飯局上，見到吳錦青同總理梁天富密密斟。梁天富形容今次跨代落實接班人係好創新嘅舉動，亦係慈善界嘅大突破。吳錦青就話咁難得遇上一百周年，梗係要慎重兼搞得好喇！佢透露，明年初將以一場慈善演唱會舉行起動禮，到時會邀請百歲人瑞共同參與。
同場仲有理工大學企業發展院課程總監鄒兆鵬，事關博愛搵理大進行一項審視董事局章則嘅研究報告。梁天富話呢份報告同百周年活動無關，但係市民對慈善機構嘅監管要求愈嚟愈高，故此希望藉此提升內部管治效能，令博愛嘅運作更加透明化。