中環出更：屯門變化大 梁志祥唔認得路

細個坐車先經過

梁志祥首個屯門辦事處尋日開幕，係同立法會議員劉國勳、屯門區議員葉文斌嘅聯合辦事處。梁志祥話自己細個嘅時候喺漢華中學嘅元朗分校讀書，間中學喺八十年代結束辦學，雖然位處元朗，但其實唔少同學都住喺屯門，其中一個知名校友就係屯門區議會主席梁健文，梁健文仲係低佢一屆嘅師弟添！

佢仲話細個嘅時候坐車先會經過屯門，當時屯門好多地方都係農田，依家變化好大，所以啱啱嚟開展地區工作嗰陣經常唔認得路，依家就好啲嘞，亦都知道講某啲位置時要講清楚，例如有個地點近某輕鐵站，就要問清楚係邊一邊，因為輕鐵站都有兩邊。

卓妮