政情：睇中港人貪新鮮 黃偉鴻打新品牌
做零售生意打響品牌好重要，不過擁有數十家知名連鎖零食店嘅中華廠商聯合會食品製造業委員會主席黃偉鴻（Ellis）就寧願另打新品牌，最近佢打算喺旺角開一間全新品牌零食店，專賣港人至愛嘅日式零食。佢笑稱，香港人食嘢夠晒貪新忘舊，既然要開新舖，不如另創一個新品牌喎。
開日式零食店
Ellis話，香港人好鍾意試新嘢，好似一啲新開張嘅日本拉麵店，食客閒閒地排隊一個小時都唔會介意，不過熱潮過後就唔見咗人龍。零食店都係一樣，故此今次佢專程喺日本落單製造啱港人口味嘅日式零食，成間店舖清一色只賣呢個品牌嘅產品，連店名都用番新品牌，同現時零食店內產品五花八門，睇到人眼花繚亂好唔同。Ellis話呢個係新嘗試，如果行得通，就會繼續開多幾間咁話。