政情：陳穎欣踢波 山度士讚好
女仔踢波唔算普遍，有時啲政界足球活動，全男班上陣亦都好正常。不過，早排深水埗區議員陳穎欣就有份落場同前香港足球先生山度士踢波，佢不單止有入球，仲獲山度士讚佢踢得好添！
最鍾意巴塞隆拿
陳穎欣話，自己好鍾意運動，雖然冇參加正規嘅訓練，但係讀中學同大學時都有踢吓波。
喺外國讀寄宿學校時，學校有草地，落去踢吓波係好平常嘅事。佢最鍾意嘅球隊就係團隊精神最好嘅巴塞隆拿嘞！
太忙難約齊隊友
不過陳穎欣自言離開校園後就較少踢波，佢話踢波最緊要係約齊隊友，但係出嚟工作後真係唔容易約，加上深水埗區議會特別多會議要開，佢都分身不暇，惟有趁參加呢啲地區活動，先有機會重拾踢波嘅樂趣。咁樣聽落，如果地區足球比賽欠腳，不妨搵吓陳穎欣呀！