政情：DQ四人組 拒回水發惡 叫梁君彥追番自己數

叫行管會追究梁君彥監誓錯誤

長毛等四人喺議員資格司法覆核案敗訴，一大筆律師費等住佢哋找數，但另一邊廂，社會上亦好關注佢哋係咪要好似同樣被取消立法會議員資格嘅青年新政游蕙禎、梁頌恆一樣，要向立法會回水。唔知係咪經濟負擔逼到埋身，長毛、劉小麗同姚松炎尋日就聯同多位民主派議員召開記者會，表明拒絕回水立場，仲將責任卸落梁君彥身上。而羅冠聰就因為衝擊公民廣場案而要上庭，未有出席。

長毛話，佢哋被取消議員資格前一直都履行議員職務，用津貼聘請嘅助理都係為香港人服務，法庭判梁君彥監誓無效，官司「第一個輸嘅係梁君彥」，認為行管會應該先追究梁君彥，因為佢失職及監誓錯誤。而佢哋已經因為官司輸咗議席、付出咗，冇可能再輸多樣。

賴港府政治壓迫 阻礙參加補選

長毛又話，特首林鄭月娥話要由行管會決定係咪向佢哋追討薪津，咁講係「蛇蠍扮羔羊」，認為林鄭可以基於公眾利益而唔使佢哋回水，質疑林鄭根本係向佢哋進行政治壓迫，令佢哋破產，唔能夠參加立法會補選。

姚松炎亦都話，佢哋出任議員期間已經提供咗服務，唔存在向服務提供者追回薪酬呢回事。劉小麗認為，一切責任應該由梁君彥及秘書長陳維安負責，就好似高鐵超支係追討「大判」，唔係去追工人喎。長毛佢哋四個出任議員九個月先至被取消資格，會又開咗、票又投咗，依家窮途末路，難怪會反撲踢番個波畀梁君彥，呢筆數真係唔知點先計得清喇。