中環出更:蔡若蓮「一家兩制」撐港教育制度

港府高官近年被指口講支持香港教育制度,但唔少人一早將仔女送到外國升學,根本無接受過香港教育制度洗禮。新任教育局副局長蔡若蓮尋日被問及兩名兒子嘅升學路徑時,形容係「一家兩制」,大仔係經歷高級程度會考(AL),細仔就係考中學文憑試(DSE),而大仔其後先到海外升讀大學。

新政府十一名副局長及政治助理尋日會見傳媒,其中最受關注係喺一片爭議聲中加入官場嘅蔡若蓮,佢透露以往做中學校長每日瞓六、七個鐘,自從出任副局長後,最初幾日就只係瞓咗四個鐘左右。

擬檢討入大學門檻

對於同教育局相關嘅多項教育議題,蔡若蓮都有問必答;佢認為應該檢討新高中學制,包括大學最低入學門檻,係咪應該以文憑試考獲「3322」去計算。

國民教育方面,蔡若蓮話本港學校一直做緊國民教育,只係方法同策略有唔同。被問及已故諾貝爾和平獎得主劉曉波等事件應否放入國民教育教材,蔡若蓮冇正面回應,僅稱應該闊啲去睇,強調教材要配合學生年齡以及未來成長。

卓妮

第一手消息請下載on.cc東網iPhone/iPad/Android/Windows Phone Apps