中環出更：醫生怕被醫李國棟睇牙會膊頭痛
牙痛慘過大病，好多人對於要睇牙，往往係未睇就已經驚定先。卓妮早前見到世界家庭醫學組織候任主席李國棟，佢話每次睇完牙唔係牙痛，結果係膊頭痛，事關佢睇牙嗰陣太緊張，揸到個拳頭實晒，膊頭又縮埋，梗係痛啦！
香港牙醫學會早前舉行晚宴，唔少醫生都有現身，講起睇牙，估唔到平日揸慣手術刀嘅一班醫生都大呼怕怕！李國棟、香港西醫工會會長楊超發及前行政會議成員「金刀梁」梁智鴻都異口同聲話，睇牙時會緊張，一嚟太清楚個程序，二嚟剝牙嗰陣可以擘大眼望到，所以更加在意！
謝德富笑稱「怕佢有牙」
不過亦有部分醫生對睇牙無所畏懼，包括香港醫療專業人士協會創會會長王賜豪，以及有「富豪御醫」之稱的心臟科醫生謝德富。其中，王賜豪形容，睇牙嗰種係酸軟唔係痛，而謝德富唔怕睇牙，更笑稱「怕佢有牙？」
講起早前有港人喺香港以外地方「整牙」後出現不良反應，牙醫學會會長梁世民話，唔同地方監管制度唔一樣，牙醫水平或者會有參差，而價錢其實未必真係會比本地平，加上睇牙或睇病都好，搵番相熟家庭醫生同牙醫睇係最穩陣，萬一有需要再作跟進都方便啲。
謝德富太太陳曦齡就自爆多年前喺外國牙痛，牙醫話因為佢隻智慧牙出唔晒，然後幫佢打咗支針檢查咗一陣就話走得；原來個牙醫檢查時已快快手幫佢剝埋隻牙，不過唔係剝智慧牙，而係智慧牙前面嗰隻，之後佢就冇再痛，佢相信醫生決定係啱嘅。
卓妮