政情：沈豪傑自爆表姐係萬綺雯
世界真係好細，有啲大家都好熟悉嘅面孔，原來有親屬關係，但係大家都唔知道，亦未必咁易睇得出，例如藝人、有「長腿女神」之稱嘅萬綺雯就係區議會主席嘅表姐。
細個會一齊行街
冇亂噏，係元朗區議會主席沈豪傑親口自爆，表姐就係藝人萬綺雯！佢仲反問記者「唔似咩」？佢話二人細個嘅時候都住得好近o架，都係住喺元朗，細個一齊喺元朗長大嘅，好耐以前仲會一齊去吓街，但最近都好少嘞，因為表姐好忙，不過每年新年都會聚一聚嘅。
會睇佢嘅舞台劇
被問到當初知道表姐入行，有冇好震驚，沈豪傑就話冇，佢話表姐自中學開始已經非常靚，自己點忙都好，都會去睇吓表姐做嘅舞台劇，捧吓佢場（口架）！萬綺雯除咗擁有四十二吋長腿之外，另一最為人驚訝嘅就係佢好快就同著名編劇陳十三結婚，咁作為表弟嘅沈豪傑當年有冇好訝異呢？佢話緣來沒法擋喎！